डा.केसीको स्वास्थ्य अवस्था बिग्रदै
काठमाडौं, ३ असोज । चिकित्सा शिक्षा सुधारका अभियान्ता प्रा.डा.गोविन्द केसीको स्वास्थ्य अवस्था जटिल बन्दै गएको छ ।
वीपी कोइराला स्वास्थ्य विज्ञान प्रतिष्ठान धरानका भ्रष्ट पदाधिकारीको बर्खास्त गर्नेसहितका माग लिएर आमरण अनशन सुरु गरेका डा.केसीको स्वास्थ्य दिनप्रतिदिन बिग्रदै गइरहेको जनाइएको छ । तर, उनको स्वास्थ्यमा सरकार संवेदनशील देखिँदैन ।
डा. केसीको तर्फबाट सरकारसँग वार्ता गर्न गठित वार्ता टोलीका सदस्य प्रीतम सुवेदीका अनुसार आज पनि सरकारसँग वार्ता हुँदैछ । स्वास्थ्य मन्त्रालयको टिमसँग आज १ बजेदेखि वार्ता सुरू हुने उनले जानकारी दिए । आजको वार्ताबाट केही सकारात्मक परिणाम आउनेमा सुवेदी आशावादी छन् ।
डा. केसीले सत्याग्रह सुरु गरेको आठौं दिन पुग्दा पनि निकाशका लागि सरकार तत्पर नहुनेले चिकित्सा शिक्षा सुधारमा संवेदनशील छैन भन्ने स्पष्ट हुन्छ । अब डा.केसीको स्वास्थ्य अवस्थाको विषयमा सरकार संवेदनशील नभए उनका समर्थनहरु सडकमा उत्रिने अवस्था देखिन्छ ।
