रास्वपा र उज्यालो नेपाल पार्टीबीच राजनीतिक एकतामा सहमति

कमलपोखरीस्थित रास्वपा नेता असिम साहको कार्यालयमा भएको निर्णायक बैठकमा रास्वपा सभापति रवि लामिछाने, काठमाडौं महानगरपालिकाका मेयर बालेन्द्र शाह (बालेन) र उज्यालो नेपाल पार्टीका संरक्षक तथा ऊर्जा मन्त्री कुलमान घिसिङ सहभागी थिए। बैठकमा वैकल्पिक राजनीतिक शक्तिहरूलाई एकताबद्ध गरेर आगामी निर्वाचनमा संयुक्त रूपमा अघि बढ्ने विषयमा सहमति जुटेको बताइएको छ।

स्रोतका अनुसार सहमतिपत्रमा दलहरूको सहअस्तित्व, परस्पर सम्मान, साझा एजेन्डा र निर्वाचन रणनीतिसम्बन्धी विषयहरू समेटिने छन्। एकतापछि पार्टीको संगठनात्मक संरचना कसरी अगाडि बढाउने, नेतृत्वको भूमिका, उम्मेदवार छनोटको मापदण्ड तथा चुनावी व्यवस्थापनबारे पनि समझदारी बनेको जनाइएको छ।

वार्तामा सहभागी नेताहरूले भ्रष्टाचार, कुशासन र राजनीतिक अस्थिरताविरुद्ध संयुक्त संघर्ष गर्ने प्रतिबद्धता व्यक्त गरेका छन्। नागरिकको अपेक्षा अनुसार सुशासन, जवाफदेहिता र राजनीतिक सुधारलाई केन्द्रमा राखेर अघि बढ्ने विषयमा पनि सहमति भएको बताइएको छ।

हाल सहमतिपत्रको भाषा र बुँदागत संरचना मिलाउने काम भइरहेको र छिट्टै औपचारिक रूपमा हस्ताक्षर तथा सार्वजनिक घोषणा हुने तयारी रहेको स्रोतले जनाएको छ। सहमति सार्वजनिक भएपछि वैकल्पिक राजनीतिमा नयाँ शक्ति समीकरणको सुरुआत हुने विश्लेषण गरिएको छ।

राजनीतिक वृत्तमा रास्वपा र उज्यालो नेपालबीचको यो एकतालाई आगामी निर्वाचन र सत्ता समीकरणमा प्रभाव पार्ने महत्वपूर्ण कदमका रूपमा हेरिएको छ। सहमति सार्वजनिक हुने मितिबारे भने औपचारिक जानकारी दिइएको छैन।