सावित्राले च्याम्पिनयसिप फाइनल नखेल्ने
काठमाडौँ, साउदी अरेबियाको जेद्दामा भइरहेको वाफ वुमेन्स च्याम्पिनयसिप २०२४ मा सावित्रा भण्डारीले फाइनल नखेल्ने निश्चित भएको छ । नेपालले सेमिफाइनलमा लेबनानलाई पराजित गर्दै फाइनल प्रवेश गरेको थियो र बिहीबार हुने उपाधि भिडन्तमा तीन पल्टको डिफेन्डिङ च्याम्पियन जोर्डनको सामना गर्दैछ ।
तर त्यही खेलका लागि सावित्रा भने उपलब्ध हुने छैनन् । उनी फ्रान्सको अन आभान्टा ग्वेनगाम्पबाट खेल्नका लागि पेरिस जानेछिन् । अखिल नेपाल फुटबल संघ एन्फाले प्रेस विज्ञप्ति जारी गर्दै सावित्रा फाइनलका लागि उपलब्ध नहुने जनाएको छ । लेबनानविरुद्ध पनि सेमिफाइनलमा गोल गरेकी सावित्रा प्रतियोगितामा उच्चकर्ता रहेकी छिन् । उनले प्रतियोगितामा नौ गोल गरिसकेकी छिन् । एन्फाका अनुसार फाइनल हुने मिति फिफाको विन्डो समयमा पर्दैन । त्यसैले उनले सेमिफाइनलपछि प्रतियोगिता छाड्न बाध्य भएको हो । एन्फाले सावित्राको अनुपस्थिति टिमका लागि निराशाजनक रहे पनि उनीबिना पनि अरू खेलाडी उच्च प्रदर्शन गर्न तयार रहेको जनाएको छ ।
