प्रभु बैंकका सिइओहरु हाजिर जमानीमा छुटे
काठमाडौं : प्रभु बैंक लिमिटेडका प्रमुख कार्यकारी अधिकृत (सिईओ) अशोक शेरचनलगायत प्रहरीको केन्द्रीय अनुसन्धान ब्युरो (सिआईबी) को हिरासतमा रहेका कर्मचारीहरु हाजिर जमानीमा छुटेका छन् । ब्युरोले अनुसन्धानको नाममा बेफ्वाँकमा चार साता हिरासतमा राखेपछि उच्च अदालत पाटनका न्यायाधीशहरु चन्द्रबहादुर सारु र गीता तिम्सिनाको गत हप्ताको संयुक्त इजलासले पाँच दिनभित्र बयान सक्न अन्तिम पटक म्याद थपको अधिकार दिएको थियो ।
ब्युरोले पाँच दिनभित्र अदालतको आदेश पालना गरेको अवस्था नदेखिएपछि शेरचनलगायत झण्डै आधा दर्जन कर्मचारी अहिले हाजिर जमानीमा छुट्ने अवस्था बनेकाे हाे । प्रभु म्यानेजमेन्टको लेनदेनको लफडामा मुछिएका देवी भट्टचन र कुसुम लामाको विवादमा अनावश्यक ढंगले सिआईबीले शेरचन र प्रभुका अन्य कर्मचारीलाई नियन्त्रणमा लिएर २७ दिन हिरासतमा राखेको थियो ।
विशेष सरकारी वकिलको कार्यालयले अशोकलाई हाजिर जमानीमा छाडिसकेको छ । रिहाइको कागज गराउन हिरासतमा रहेका मणीराम भुसाल,रिवाज श्रेष्ठ र राजेन्द्र शाक्यहरुलाई सिआइबी मुख्यालय,लैनचौर लगिएको छ । यसअघि देवी भट्टचन पनि सरकारी वकिल कार्यालयबाटै छुटेका थिए ।
