NPL मा विराटनगर बाहिरिँदा पोखराको प्लेअफ सम्भावना
काठमाडौं : नेपाल प्रिमियर लिग एनपीएलमा बिहीबार भएको खेलमा रेमन्ड रिफरको शानदार प्रदर्शनमा पोखरा एभेन्जर्सले विराटनगर किङ्ग्सलाई सुपरओभरमा पराजित गर्दै प्ले अफमा पुग्ने सम्भावनालाई कायमै राखेको छ । पोखराको जितमा रेमन्ड रिफर नायक बनेका हुन् । खेललाई बराबरीमा पुर्याउनेदेखि सुपर ओभरमा बलिङ र ब्याटिङ दुवैमा शानदार प्रदर्शन नै पोखराको जितको कारण बन्यो । १४० रनको विजय लक्ष्य पछ्याएको पोखरा एभेन्जर्सले २० ओभरमा ६ विकेट गुमाउँदै १३९ रन बनाएपछि खेल सुपरओभरमा गएको थियो ।
सुपरओभरमा पराजयसँगै प्लेअफको सम्भावनासमेत गुमाएको विराटनगर किङ्सका कप्तान सन्दीप लामिछानेले सुपरओभरमा बलिङ गर्नका लागि आफूमा आत्मविश्वास रहे पनि निर्णय सही नभएको प्रतिक्रिया जनाए ।
विराटनगरविरुद्ध सनसनीपूर्ण जीत निकालेको पोखराका बलर विपिन खत्रीले सुपर ओभरमा जानुपर्ने लक्ष्य नभए पनि राम्रो ब्याटिङ हुन नसकेको बताएका छन् । तर रेमोन रेइफोर्टले अन्तिम ओभरसँगै सुपर ओभरमा पनि अलराउण्ड प्रदर्शन गरेपछि जित निस्किएको उनले बताए ।
निर्धारित २० ओभरको खेलमा टस जितेर पहिले ब्याटिङ रोजेको विराटनगरले ७ विकेट गुमाउँदै मात्र १ सय ३९ रन बनायो । १ सय ४० रनको विजइलक्ष्यसहित जवाफी ब्याटिङ्मा उत्रिएको पोखराले २० ओभरमा ६ विकेटको क्षतिमा १ सय ३९ रन जोडेपछि खेल सुपरओभरमा गएको थियो । सुपरओभरमा पोखराले विराटनगरविरुद्ध १४ रनले जीत निकालेको थियो । यो जितसँगै ४ अंक जोडेको पोखराको प्लेअफ सम्भावना जिवित छ । यता, पाँच खेलमा चौथो हार र एक जीतसहित २ अंकमा सीमित विराटनगर भने लिग चरणबाटै बाहिरिएको छ । विराटनगर लिगबाट बाहिरिने दोस्रो टिम हो । यसअघि लुम्बिनी पनि लिग चरणबाटै बाहिरिइसकेको छ ।
