गोदावरीमा निर्माणाधीन सभाहलको शुक्रबार प्रधानमन्त्रीले उद्घाटन गर्ने
काठमाडौं । शुक्रबार प्रधानमन्त्री केपी शर्मा ओलीले गोदावरीमा बनेको सभा हलको उद्घाटन गर्ने भएका छन् । प्रधानमन्त्री ओलीले बालुवाटारबाट भर्चुअल रुपमा सभाहल उद्घाटन गर्ने कार्यक्रम तय भएको छ ।
‘हामी केही व्यक्ति मात्रै सभा हल पुग्छौं, मन्त्री र प्रधानमन्त्रीज्युहरुले बालुवाटारबाटै सभा हलको उद्घाटन गर्नुहुन्छ,’ शहरी विकास विभागका महानिर्देशक नवराज प्याकुरेलले भने,’यो सभाहल उद्घाटनपछि एकैपटक ३ हजार व्यक्ति सहभागी हुने एउटै कार्यक्रम एउटै हलमा गर्न सकिन्छ ।’
प्याकुरेलका अनुसार अब सभा हलमा सरसफाइका काम मात्र बाँकी छन् । शहरी विकास विभागका सिनियर इन्जिनियर मचकाजी महर्जन ९८ प्रतिशत काम भइसकेको बताउँछन् । ‘अहिले अन्तिम चरणको तयारी गरिररहेका छौं,’उनले भने,’पर्सीसम्म धेरैजसो सकिन्छ ।’
विभागका अनुसार २०७६ कार्तिकमा ५ महिनामा सक्ने गरी सभाहल निर्माणको काम थालिएको थियो । सुरुमा ६२ करोड लागतमा ठेक्का लागेको सभा हलमा ८१ करोड खर्च भइसकेको छ ।
केसी-समानान्तर जेभीले ठेक्का पाएको यो सभाहल बनाउन २ पटक म्याद थप भएको थियो । ४३ रोपनी १५ आनामा बनेको सभाहलमा ३ हजार वटा सिटहरु छन् । सभा हल प्रवेश गर्ने साना हलहरु पनि छन् । पार्किङ र बगैँचा पनि बनाइएको छ ।
