एकीकृत समाजवादीको चुनाव चिन्ह कलम राख्ने, एक उपमहासचिव र तीन सचिव थपिए
काठमाडौँ । एकीकृत समाजवादीले पार्टीको पदाधिकारी संख्या थप गरेको छ।
हिजो काठमाडौंमा सम्पन्न भएको स्थायी कमिटी बैठकले एक उपमहासचिव र तीन जना सचिव थप गर्ने निर्णय गरेको हो।
उपमहासचिवमा प्रवक्ता समेत रहेका जगन्नाथ खतिवडालाई मनोनयन गरिएको छ भने थपिएका तीन जना सचिवमा गरिमा शाह, जीवनराम श्रेष्ठ र भागवत विश्वास रहेका छन्।
यसअघि समाजवादीले उपमहासचिवमा डा. विजय पौडेल, डागंगालाल तुलाधर र प्रकाश ज्वालालाई मनोनयन गरेको थियो।
त्यस्तै रामकुमारी झाँक्री, जगन्नाथ खतिवडा, नागेन्द्र चौधरी र केशवलाल श्रेष्ठ सचिव बनाइएको थियो। बिहीबारको बैठकले खतिवडालाई उपमहासचिवमा बढुवा गर्ने निर्णय गरेको नेतृ झाँक्रीले जानकारी दिइन्।
समाजवादीले पार्टीको चुनाव चिन्ह कलम राख्ने निर्णय गरेको छ।
