‘बालकुमारीमा मारिएका युवाको परिवारलाई सरकारले रोजगारी र राहत देओस्, छानबिन प्रतिवेदन घर्रामा थन्क्याउने गल्ती नगराेस्’
काठमाडाैं । नेकपा एमाले अध्यक्ष केपी शर्मा ओलीले बालकुमारी घटनामा ज्यान गुमाएका सुजन रावत र वीरेन्द्र शाहको परिवारलाई सरकारले रोजगारी र राहत दिनुपर्ने बताउनुभएकाे छ ।
मृतक रावत र शाहको परिवारलाई सरकारले तत्काल राेजगारी र राहत दिनुपर्ने अध्यक्ष ओलीले सामाजिक सञ्जालमा उल्लेख गर्नुभएकाे छ ।
रावत र शाहका परिवारको पीडा सुन्दा मन बेचैन भइरहेको उहाँले उल्लेख गर्नुभएकाे छ ।
छानबिन समिति बनाउने र छानबिनको प्रतिवेदन घर्रामा थन्क्याउने काम नगर्न समेत अध्यक्ष ओलीले सरकारलाई चेतावनी दिनुभएकाे छ ।उहाँले लेख्नुभएकाे छ – ‘बालकुमारी घटनामा ज्यान गुमाएका २३ वर्षीय सुजन रावत र २२ वर्षीय वीरेन्द्र शाहको परिवारजनका पीडाका खबर पढेर मन बेचैन भइरहेको छ, छोरा सुजनको अनायास हत्यापछि उनकी विधवा आमाको अवस्थाले मन पोल्छ, कोरिया जाने तयारीमा रहेका सन्तानको हत्याबाट आहत परिवारका अन्य सदस्यलाई सरकारले रोजगारी र राहत दिनुपर्छ, छानबिन समिति बनाउने र छानबिनको प्रतिवेदन घर्रामा थन्क्याउने गल्ती नहोस् ।’
