फिफा विश्वकप विजेता कार्लोस नेपाल आउने
काठमाडौं : ब्राजिल राष्ट्रिय फुटबल टिमका पुर्व खेलाडी रोबर्टो कार्लोस नेपाल आउने भएका छन् । नेपाल सुपर लिग (एनएसएल) को तेस्रो संस्करणमा सहभागी हुन फिफा विश्वकप विजेता कार्लोस नेपाल आउने घोषणा आयोजकले गरेको हो ।
नेपाल स्पोर्टस एन्ड इभेन्ट म्यानेजमेन्टले आज भएको धनगढी एफसी र ललितपुर सिटी एफसीबीचको खेलको पहिलो हाफमा कार्लोस आउने आधिकारिक जानकारी दिएको थियो । दशरथ रंगशालाको स्क्रीनमा कार्लोसको सन्देश सहितको भिडिओ प्ले गरिएको थियो । उनी प्लेअफको समयमा काठमाडौं आउनेछन् ।
विश्व फुटबलका उत्कृष्ट डिफेन्डरमध्येका एक कार्लोसले सन १९९२ मा ब्राजिलको सिनियर टिममा डेब्यु गरेका थिए । २००६ सम्म राष्ट्रिय टिमको जर्सी लगाएका उनले तीन विश्वकप खेल्दै १२५ क्याप जितेका छन् । उनको नाममा १० गोल छ । उनी सम्मिलित ब्राजिलले २००२ मा दक्षिण कोरिया र जापानमा भएको विश्वकप उपाधि जितेको थियो ।
कार्लोसले आफ्नो व्यावसायिक करिअरको अधिकांश समय स्पेनिस क्लब रियल मड्रिडमा बिताए । १९९६ देखि २००७ सम्म मड्रिडबाट खेल्दै उनले ३७२ खेलमा ४८ गोल गरेका थिए ।
