गिभिना मगरको आमा दुर्घटनामा मृत्यु, विक्षिप्त भाइले भोलिपल्टै गरे आत्महत्या
काठमाडौं : सामाजिक सञ्जाल टिकटकबाट उदाएर समाजकर्ममा लागेकी गिभिना मगरमाथि अहिले बज्रपात परेको छ । एकसाताअघि मात्रै विवाह बन्धनमा बाँधिएकी उनले दुई दिनको फरकमा आमा र भाइ गुमाएकी छन् ।
आफूलाई जन्मदिने आमालाई शुक्रबार सधैँका लागि गुमाएकी उनले शनिबार भाइलाई गुमाउन पुगिन् । आमाको मृत्यु सडक दुर्घटनाबाट भएको थियो । भाइले पनि आत्महत्या । अनपेक्षित यी शृंखलाबद्ध अप्रिय खबरले २७ वर्षीया गिभिनालाई कमजोर बनाएको छ । गत साता मात्र विवाह बन्धनमा बाँधिएकी उनी नयाँ जीवनको हनिमुनमा रहेकै बेला उनीमाथि यो बज्रपात आइपरेको हो ।
काठमाडौंमा रहेकी उनी पोखरामा रहेकी आमा एक्कासि सडक दुर्घटनामा परेर अचेत रहेको अप्रिय खबरले सहयोगको बिलौना गर्दै सामाजिक सञ्जालमार्फत लाइभ आएकी थिइन् । आफ्ना शुभचिन्तक तथा आफन्तलाई यदि नजिकै भए पोखराको अस्पताल गइदिएर सहयोग गरिदिन अनुनय विनय गरिन् । तर, दैवको लीला उनकी आमा धनकुमारीको उपचारका क्रममा निधन भयो ।
पोखरा–बागलुङ राजमार्गअन्तर्गत हेमजा याम्दीको क्रान्तिटोलमा शुक्रबार साँझ साढे ७ बजे सो दुर्घटना भएको हो । जिल्ला प्रहरी कार्यालय कास्कीका अनुसार दुर्घटनामा संलग्न ग२ख १४६० नम्बरको ट्रक र ट्रक चालकलाई नियन्त्रणमा लिएर अनुसन्धान भइरहेको छ । गिभिना परिवारकी जेठी छोरी हुन् । उनका दुई जना भाइ हुन् ।
पोखरा महानगरका प्रवक्तासमेत रहेका वडाध्यक्ष तिम्सिनाले टिकटक अभियानमार्फत सबैको सेवा गर्दै आएकी गिभिनाको घरमा एकैपटक दुई घटना हुन पुगेकामा निकै चिन्तित बनाएको बताए । उनका अनुसार त्यस दिन छोरा (गिभिनाका भाइ)ले बाबुआमालाई छाडेर घर फर्किएका रहेछन् । आमाको सडक दुर्घटनामा मृत्युपछि सहन नसकी सुसाइड गरेको पाइयो ।
उनले अगाडि भने, ‘घटना सुनेपछि म पनि बिहान गिभिनाको घर गई परिवारका सदस्य र आफन्तलाई सान्त्वना दिएर फर्किएको हुँ ।’ गिभिनाका भाइ शनिबार बिहान घरमै झुन्डिएको अवस्थामा फेला परेको जिल्ला प्रहरी कार्यालयले पुष्टि गरेको छ ।
दाङको मगर परिवार लामो समयदेखि पोखरा आएर बसेको हो । गिभिना ७ वर्षको उमेरमा दाङदेखि आएर हेमजाको याम्दीमा बस्दै आएकी थिइन् । दीनदुःखीको सेवामा सधैँ लागिपर्ने गिभिना केही वर्षयता टिकटकमार्फत चर्चित बनेकी हुन् । उनका लाखौँ फ्यान छन् । सानैदेखि सामाजिक कार्यमा रुची राख्ने गिभिनाले गत ८ मंसिरमा धरानका किरण लिम्बुसँग लगनगाँठो कसेकी हुन् ।
वैदेशिक रोजगारीमा रहेका धरानका किरणसँग साधारण ढंगले विवाह गरेकी गिभिनालाई उनका फ्यानले विभिन्न माध्यमबाट प्रेमपूर्वक शुभकामना दिइरहेका थिए । तर, विवाहको एक साता नबित्दै चोटमाथि चोटले सबैलाई दुःखी बनाएको छ । पोखराकै कालिका क्याम्पसबाट बीएड गरेकी यी अभियन्ता पछिल्लो समय पोखराको कुमुदिनी होम्सकी शिक्षिका थिइन् ।
उनले असहाय, गरिब, निमुखाको सेवा गर्दै आएकी छन् । उनले सडकमा कयौं असहायलाई उद्धार गरी मानव सेवा आश्रम तथा वृद्धाश्रममा लगेकी छन् । सहयोग कार्यमा आफूलाई सन्तुष्टि मिल्ने गरेको उनी बताउँछिन् । युवाका लागिसमेत प्रेरणा बनेकी गिभिनाले गरेका सयौँ सहयोगका क्रियाकलाप सामाजिक सञ्जाल फेसबुक, टिकटक, इन्स्ट्राग्रामलगायतमा पेजमा भेट्न सकिन्छ । २ वर्षअघि उनलाई स्टार्स फाउन्डेसन कास्की नेपालले वर्ष स्टार्स समाजसेवी पुरस्कार प्रदान गरेको थियो ।
