पोखरामा अन्तर्राष्ट्रिय स्तरको लायन्स कप पुरुष भलिबल प्रतियोगिता हुने
काठमाडौं : लायन्स इन्टरनेशनल डिष्ट्रिक्ट ३२५ एम नेपालको आयोजनामा पोखरामा अन्तर्राष्ट्रिय स्तरको लायन्स कप पुरुष भलिबल प्रतियोगिता हुने भएको छ । आयोजकले सोमवार काठमाडौंमा पत्रकार सम्मेलन गर्दै प्रतियोगिता २०८२ वैशाख १८ देखि २२ गतेसम्म पोखरा रंगशालास्थित मल्टिपर्पोज हलमा हुने जानकारी दिएको हो । मानविय सेवा गर्ने कम्पनी लायन्स इन्टरनेशनलको स्थापनाको १०७ वर्ष र नेपालमा यसको स्थापना भएको ५३ वर्ष पूरा भएको अवसरमा नेपालको राष्ट्रिय खेल भलिबललाई प्रवर्द्धन गर्दे उद्देश्यले नेपालमा पहिलो पटक अन्तर्राष्ट्रिय स्तरको लायन्स कप भलिबल आयोजना गर्न लागेको लायन्सका डिष्ट्रिक्ट गभर्नर चण्डीप्रसाद अर्यालले बताए । लायन्स कप भलिबल प्रतियोगितामा तीन विभागीयसहित आठ टोलीले सहभागिता जनाउने छन्। आयोजक लायन्स इन्टरनेसनल नेपालका अनुसार प्रतियोगितामा नेपालका पुलिस क्लब, त्रिभुवन आर्मी क्लब, एपिएफ क्लब र गण्डकी प्रदेश भलिबल संघले सहभागिता जनाउने छन्। यस्तै, पाकिस्तान भलिबल क्लब, इस्लामवादले पनि सहभागिता जनाउने पक्का भइसकेको छ। ‘भारत र इरानको टिमसँग सरसल्लाह भइरहेको छ। सम्झौता गर्न बाँकी छ,’ डिस्ट्रिक्ट गभर्नर चण्डीप्रसाद अर्यालले भने। उनका अनुसार प्रतियोगिताको विजेताले चार लाख ४४ हजार ४४४ रुपैयाँ प्राप्त गर्नेछन्। उपविजेता टोलीले दुई लाख ४४ हजार ४४४ र तेस्रो हुने टोलीले एक लाख ४४ हजार ४४४ रुपैयाँ प्राप्त गर्नेछन्। प्रतियोगिताको सर्वोत्कृष्ट खेलाडीले १४ हजार ४४४ र विधागतमा आठ हजार ४४४ रुपैयाँ प्राप्त गर्नेछन्।
