नगर प्रमुख,उपप्रमुखको पहिरो अवलोकन : जोखिम अध्ययन गरेर स्थानान्तरण गरिने
मेलम्ची / मेलम्ची नगर पालिकाका प्रमुख आइतमान तामाङले नगरभित्रका प्राकृतिक प्रकोपमा परेका तथा जोखिममा रहेका बस्ति तथा संरचनालाई जोगाउनका लागि नगरपालिका सधै तयार रहेको बताउनुभएको छ । नगर प्रमुख तामाङले अहिले नगरपालिकाको प्राय सबै वडाहरुमा पहिरो गइरहेको, नदि तटिय क्षेत्रहरुमा नदिले कटान गरिरहेको अवस्थामा नगरले भ्याएसम्मको काम गरिरहेको दावि गर्नुभयो ।
सोमबार वडा नम्बर २ निबुगाउँमा गएको पहिरोको स्थलगत अवलोकन गर्दै प्रमुख तामाङले जोखिममा रहेका बस्ति स्थानान्तरणका लागि आफ्नो ध्यानाकर्षण भएको बताउनुभयो । अवलकोनकै लागि पुग्नुभएकि उपप्रमुख उमा प्रधानले पनि नगरका कमजोर भूभागमा अहिले धमाधम पहिरो गइरहेको भन्दै जोखिममा रहेका बस्ति संरक्षण र स्थानान्तरणमा नगरले पिडितहरुसँग हातेमालो गर्दै अगाडि बढ्ने बताउनुभयो ।
उहाँले अझैपनि पानी परिरहेको बताउदै जोखिमयुक्त स्थानमा नबस्न समेत आग्रह गर्नुभयो । उपप्रमुख प्रधानले स्थानिय सरकारले मात्र काम गर्न नसक्ने भन्दै सघं र प्रदेश सरकारले पनि यस विषयमा चासोका साथ हेर्नुपर्नेमा जोड दिनुभयो । अवलोकनमा वडा नम्बर २का वडा अध्यक्ष नगेन्द्र प्रसाद खतिवडाले पिडितहरुको माग र तत्कालिन समस्याका बारेमा प्रमुख र उपप्रमुख लाई जानकारी गराउनुभएको थियो ।
२० गते बेलुका गएको पहिरोले निबुगाउँका १६ घर उच्च जोखिममा रहेको छ भने जोखिममा रहेका हरु छिमेकिकोमा आश्रय लिएर बस्न परेको छ । अवलोकन पछि बाटो खुलाउनका लागि काम सुरु भएको छ ।
