लुम्बिनी प्रदेशमा राष्ट्रिय सभाको मतदान सुरु
जेष्ठ १७ । लुम्बिनी प्रदेशमा रिक्त एक राष्ट्रिय सभा सदस्यका लागि हुने उपनिर्वाचन सुरु भएको छ ।
नेकपा एमालेबाट चन्द्रबहादुर खड्का उम्मेदवार छन्। नेपाली कांग्रेसबाट दीर्घनारायण पाण्डे उम्मेदवार छन्। यहाँ विपक्षी गठबन्धनबाट पाण्डे उम्मेदवार छन्। कांग्रेसका उम्मेदवार रहेका उनलाई नेकपा माओवादी केन्द्र, जनता समाजवादी र राष्ट्रिय जनमोर्चाको समर्थन छ।
यहाँ प्रदेश सभा सदस्य ७९ जना छन् भने स्थानीय तहका प्रमुख तथा उपप्रमुख गरी २१७ जना छन्। कूल मतदाता २९६ जना रहेको निर्वाचन अधिकृतको कार्यालयले जनाएको छ। यहाँ स्थानीय तहतर्फ एमालेका ९१ जना प्रमुख तथा उपप्रमुख छन्। कांग्रेसका ६४, माओवादी केन्द्रका ३९, जसपाका १३ र जनमोर्चाका ५ जना सदस्य छन्। राप्रपाका दुई र स्वतन्त्र ४ जना छन्।
यसअघि जेठ ६ गते बागमतीमा भएको राष्ट्रिय सभा उपनिर्वाचनमा नेकपा एमालेका उम्मेदवार रामबहादुर थापा बादललाई हराउँदै स्वतन्त्र उम्मेदवार खिमलाल देवकोटा बिजयी भएका थिए।
