प्रधानमन्त्री र मन्त्रीहरू सम्पत्ति विवरण सार्वजनिक नगरी बिदा हुने तयारीमा
काठमाडौं। प्रधानमन्त्री शेरबहादुर देउवाले सरकारको नेतृत्व गरेको १४ महिना पुग्दा समेत अझै सम्म आफ्नो सम्पत्ति विवरण सार्वजनिक गरेका छैनन्।
सम्पत्ति विवरण सार्वजनिक नगर्नेमा प्रधानमन्त्री देउवासहित गठबन्धनबाट सरकारमा सामेल भएका मन्त्रीहरूले समेत आफ्नो सम्पत्ति विवरण सार्वजनिक गरेका छैनन्। सम्पत्ति विवरण सार्वजनिक नगरेरै प्रधानमन्त्री र मन्त्रीहरू बिदा हुने तयारीमा छन् । पाँच दल मिलेर गठबन्धन सरकार बनाएपछि बिदा भएका मन्त्रीहरू वा बहालवाला मन्त्रीहरू मध्ये कसैले पनि हालसम्म आफ्नो सम्पत्ति विवरण सार्वजनिक गरेका छैनन् ।
प्रधानमन्त्री तथा मन्त्रिपरिषद् कार्यालयमा प्रधानमन्त्री र मन्त्रीहरूको सम्पत्ति विवरण प्राप्त भए पनि सार्वजनिक नगरी गोप्य राखिएको छ।
यसअघिका प्रधानमन्त्री केपी शर्मा ओली र मन्त्रीहरूको सम्पत्ति विवरण सार्वजनिक भएको थियो ।
